Uburusiya bwamaganye ibikorwa bya Ukraine

Sergei Lavrov yongeye kwamagana igikorwa cya Ukraine cyo kurinda umutekano mu burasirazuba, avuga ko iyo leta iri gushora intambara mu baturage b'icyo gihugu.

Ministiri w'ububanyi n'amahanga w'Uburusiya yavuze kandi ko Uburusiya buzafasha mu kubonera umuti ikibazo cyo muri Ukraine nkuko byemejwe mu nama yabereye i Geneve mu cyumweru gishize.

Ariko ministiri w'intebe wa Ukraine, Arseny Yatsenik, yavuze ko Uburusiya bushaka gutangiza intambara ya gatatu y'isi bwigarurira Ukraine bukoresheje ingufu za gisirikare na politiki.

Mbere yaho ministiri w'ububanyi n'amahanga w'Amerika, John Kerry, yari yashinje Uburusiya kuba nta kintu na kimwe cy'ingirakamaro bwari bwakora mu gufasha kugabanya icyuka kibi kiri muri Ukraine kuva aho bwemereye amahanga kubikora.

Hagati aho, urukiko mpuzamahanga mpanabyaha rw'i La Haye rwatangiye iperereza rya mbere ku byaha bivugwa ko byakorewe muri Ukraine mbere na nyuma y'ihirikwa ry'ubutegetsi bwa Viktor Yanukovych.