Dr. Dre agiye kuba umuherwe wa mbere muri Hip Hop urengeje miliyari y’amadolari

Umuraperi Dr. Dre, nyuma yo kugurisha ibyuma byifashishwa mu kumva umuziki (headphones) n’uruganda rwa Apple akayabo k’amadorali biratuma aba ariwe muraperi wa mbere ugira amafaranga menshi kurusha abandi ku isi.

TMZ yatangaje ko izi headphones zisanzwe zizwi ku izina rya Beats Electronics hamwe n’uburenganzira bwo kuzikora, byishyuwe amafaranga agera kuri miliyari 3 z’amadorali ya Amerika.

Dr. Dre yari yafatanyije na Jimmy lovine mu kurema izi Beats mu mwaka wa 2008. Ibi bivuze ko buri wese afite uruhare kuri aka kayabo k’amafaranga.

The The Guardian mu nkuru yatangaje kuwa 9 Gicurasi, yavuze ko muri aya mafaranga Dr. Dree ubwe azatwara amafaranga agera kuri miliyoni 800 z’amadorali ya Amerika. Aya mafaranga niyiyongera kuyo yari atunze, biratuma Dr. Dre aba ariwe muraperi wa mbere ufite umutungo ugera kuri miliyari y’amadorali.

Dre yari asanzwe ari uwa kabiri mu baraperi bafite amafaranga menshi kurusha abandi ku isi n’umutungo uhwanye na miliyoni 550 z’amadorali mu gihe Diddy ariwe wazaga imbere n’akayabo ka miliyoni 700 z’amadorali, uyu amafaranga afite ari kwiyongera kubera televiziyo ye bwite yitwa Revolt TV itambutsa ibijyanye n’umuziki.

Dr Dre w’imyaka 49 y’amavuko ni umuraperi akaba na producer. Amazina ye nyakuri ni Andre Young. N’ubwo yitwa Dr. ni iryo yihaye nta mashuri yize ngo ahabwe iyo mpamyabumenyi.

Mu bihugu byateye imbere mu muziki nka Leta Zunze Ubumwe za Amerika, abahanzi baba bafite ibindi bintu bibinjiriza ndetse rimwe na rimwe bikabinjiriza kurusha umuziki.

Mu rutonde ruheruka rwa Forbes ku baraperi bakize kurusha abandi ku isi, batanu ba mbere bose bagiye bagaragaraho ko bafite indi mitungo ibinjiriza.

Jay Z, umugabo wa Beyonce, uza ku mwanya wa 3 na miliyoni 520, awicayeho kubera Roc Nation Sports, ikigo gishya cya siporo cye bwite kibarizwamo abakinnyi bakomeye muri Baseball nka Robinson Cano n’abandi.

Umuraperi 50 Cent ni uwa 5 kubera ya gurishije ikompanyi ye yitwa Vitaminwater mu mwaka wa 2007, bikamuhesha amahirwe yo kuza kuri uru rutonde na miliyoni 100 z’amadorali ya Amerika.